寫下童真

 

 

那天午飯後在商場閒逛，來到一家新開的文具店，簡潔的粉色裝璜，一股清新的歐洲味，原來是家瑞典文具設計公司。從來最愛就是逛文具店，加上其精緻的設計，已然中伏。

看到這本子，那不就是我最愛記錄的童稚真言嗎？沒有本子，一向只會逐點隨處記錄在電話，臉書和BLOG上，偶爾忘了立刻記下便忘了。心諳: 設計師肯定都是父母，這心思大概只有當父母才會懂。拿著，立刻心動，我BUY他的心思，只好乖乖付賬。

順道輯錄了數則近日對話：

WHO: 昱

AGE:　4Y2M

WHEN：2015年5月某日晚上9時

WHERE：家中

QUOTE: 飛天遁地上太空遍 - Submarine  

昱：媽媽，我地去旅行嗰時呢，我想坐submarine去睇魚呀，係水族館度好近嘅

日月媽：好近睇㗎，不過應該冇submarine坐架

昱：咁我地去旅行嗰時，我想坐airplane 呀

日月媽：係呀，會坐飛機㗎

昱：我想坐火箭呀，係咪即係airplane?

日月媽：火箭係rocket, airplane係飛機，我地坐飛機就得嘞

昱：哦，媽媽，我講錯咗呀，我係想坐火箭 rocket，講錯咗 airplane添

日月媽：坐火箭？哇！咁你要讀好多書，識好多天文科學嘅知識先可以喎，咁你比心機啦！

WHO: 昱

AGE:　4Y2M

WHEN：2015年5月9日上午10時20分

WHERE：往游泳班的路上

QUOTE: 狐狸大灰狼的壞人

昱：係咪全世界好多好人，好少壞人㗎？

日月媽媽：都有㗎，你大個啲可能會見到多啲

昱：媽媽，我揸火箭嗰時呢，見到啲壞人呀

日月媽媽：係呀？佢地咩樣㗎？

昱：佢地好似狐狸咁樣，又好似大灰狼咁樣，有條好長嘅尾巴嘅

日月媽媽：嗰啲係咪故事書裡面嘅壞人？

昱：唔係，我揸火箭嗰時撞咗啲壞人

日月媽媽：唔好，佢地做壞人會受到懲罰的了，如果你撞佢地，你就會變咗做壞人囉，因為好人唔會傷害人㗎嘛，係咪？

昱：係，知道。

WHO: 昱

AGE:　4Y2M

WHEN：2015年5月某日晚上8時30分

WHERE：家中廁所(昱辦大事中)

QUOTE: 室內設計師篇

昱:媽媽，點解個廁所咁樣樣嘅？

日月媽：點樣樣？

昱：點解門口晌呢度，廁所晌呢度？

日月媽：你係話個設計！我地買層樓番來時上手業主已經係咁樣設計咗，我地無改過間格，唔好咩？

昱：咁你同爸爸間房又點解咁設計嘅？

日月媽：其實我地都無改過間隔，打通咗個房，只係重新裝修過⋯

昱：咁廚房呢？點解個洗衣機唔放係廚房嘅？

日月媽：因為廚房細，洗衣機又要用水，放晌出面廁所會方便啲，咁廚房放多啲野，個廳整齊啲靚啲囉

昱：我鐘意個洗衣機擺廚房呀，咁樣樣唔靚呀

日月媽：係呀（滴汗中!）

昱：咁點解屋企成日都望住船同海，我想望到馬路呀

日月媽：望海好舒服喎，個風景好靚喎，近馬路會好嘈㗎喎

昱：我想望車車呀，我想好似Lucas Oscar佢地屋企咁望到出街行過嗰度，即係呢，樓下搭車車嗰度呢。

日月媽：哦

昱：不如我地搬屋囉，搬去望到車車嘅屋呀，好唔好呀？

日月媽：搬屋好大件事㗎喎，等我同爸爸商量吓先啦！